Հայաստանի ԱԳՆ դիրքորոշումը` Ուքրանական ճգնաժամի վերաբերեալ
Հայաստանի արտաքին գործոց նախարարութիւնը իր խօսնակի միջոցով յայտնած է ցաւակցութիւն
Ուքրանիոյ եւ Ուքրանացի ժողովուրդին. Այս մասին՝ ըստ Սիվիլնեթի՝ Մարտ 10-ին Երեւանի մէջ
յայտարարած է Էդուարդ Նալպանտեան Սերպիոյ արտաքին գործոց նախարար Իւան Մրկիչի հետ համատեղ
ասուլիսի ընթացքին` պատասխանելով Ուքրանիոյ մէջ տեղի ունեցող զարգացումներուն նկատմամբ
Հայաստանի դիրքորոշման վերաբերեալ հարցին եւ այն նկատառումին, որ Հայաստանի կողմէ գրառում
չէ կատարուած Ուքրանիոյ դեսպանատան մէջ բացուած սգոյ մատեանին մէջ: «Կարծում եմ, դրանք
անտեղի եւ անիմաստ շահարկումներ են, որովհետեւ Արտաքին գործերի նախարարութիւնը իր խօսնակի
միջոցով յայտնել է ցաւակցութիւն Ուքրաինային, Ուքրաինայի ժողովրդին: Դա եղել է այդ սգոյ
մատեանի բացումից մէկ-երկու օր առաջ: Սգոյ մատեանի բացման կապակցութեամբ արտգործնախարարութիւնը
նոթա է ստացել Երեւանում Ուկրաինայի դեսպանութիւնից, որը մուտքագրուել է Փետրուար 24-ին`
սգոյ մատեանը մատեանի բացման յաջորդ օրը: Նոյն օրը Ուքրաինայի դեսպանի հետ հեռախօսազրոյց
է ունեցել արտգործնախարարութեան ներկայացուցիչը, եւ դեսպանն ըմբռնումով է մօտեցել` այդ
յայտագիրը իրօք ուշացումով է ստացուել»,- ըսած է Նալպանտեան` աւելցնելով, որ Ուքրանիոյ
մէջ տեղի ունեցող իրադարձութիւններու առնչութեամբ Հայաստանի մօտեցումները արտայայտուած
են «ամենաբարձր մակարդակով` Հանրապետութեան նախագահը խօսած է ատոր մասին»: ՀՀ արտաքին
գործոց նախարարը յոյս յայտնած է, որ կը ձեռնարկուին բոլոր հնարաւոր քայլերը, որպէսզի
«իրաւական դաշտին մէջ խաղաղ ճանապարհով լուծումներ գտնուին, որոնք կը նպաստեն լարուածութեան
նուազման եւ կուտակուած հարցերու լուծման»: Անդրադառնալով այն հարցին, թէ արդեօք քննարկուած
է Հաւաքական անվտանգութեան պայմանագրի կազմակերպութեան ձեւաչափին մէջ ուքրանական ճգնաժամը,
եւ եթէ քննարկուի, ապա Հայաստանը ինչ դիրքորոշում պիտի որդեգրէ, Նալպանտեան պատասխանած
է, որ «ընդհանրապէս չի սիրեր «եթէ»-ներով խօսիլ»: «Ի հարկէ, բնական է, որ ՀԱՊԿ շրջանակներում
քննարկւում են բազմաթիւ հարցեր, որովհետեւ այդ շրջանակում արտաքին քաղաքականութեանը կոորդինացնելու
(համակարգելու) վերաբերեալ պայմանաւորուածութիւն կայ: Երբ որ այդպիսի քննարկումներ լինեն,
այդ ժամանակ կը տեսնենք` ինչպիսի զարգացումներ կը լինեն, եւ համապատասխան ինչպիսի դիրքորոշումներ
կ’արտայայտուեն»,- ըսած է ՀՀ արտաքին գործոց նախարարը: Ուքրանիոյ Գերագոյն ռատան Փետրուար
22-ին որոշում ընդունեց Մայիս 25-ին արտահերթ նախագահական ընտրութիւններ իրականացնելու
մասին` Եանուքովիչին պաշտօնանկ ընելով սահմանադրական պարտականութիւններու կատարումէն:
Ինքը` Եանուքովիչը, կը յայտարարէ, որ կը շարունակէ մնալ օրէնքով ընտրուած նախագահ: Գերագոյն
ռատայի Փետրուար 23-ի որոշումով նախագահի ժամանակաւոր պաշտօնակատար նշանակուեցաւ խորհրդարանի
խօսնակ Ալեքսանտր Թուրչինովը, որ կը համարուի Ուքրանիոյ նախկին վարչապետ Եուլիա Տիմոշենքոյի
«աջ ձեռքը»: